عمال شركة النيل للسكر في الحوامدية يطالبون بحقوقهم من نجيب سويرس


عمال  
شركة النيل للسكر في البحيرة

يقولون لنجيب سويرس

سمعناك في التلفزيون بتقول أنك بتقف مع العمال المظلومين

إحنا اتفصلنا من شركتك،

عاوزين نرجع شغلنا ونتثبت

ويردولنا فلوسنا اللي بيسرقوها مننا من سنتين

 

كتبت – فاطمة رمضان

في شركة النيل للسكر بالبحيرة، المملوكة لنجيب سويرس والكائن بالكيلو 56 صحراوي، تم طرد حوالي 20% من العمال بالشركة من أعمالهم، بحجة تقليل النفقات.

الحقيقة أن فصل وتشريد أكثر من 100 عامل دفعة واحدة (من أصل 600 عامل هذا بخلاف العمالة الموسمية التي تعمل شهرين أو ثلاثة أشهر فقط في موسم البنجر ثم تسرح)، لم يأتي لتقليل النفقات كما تدعي إدارة الشركة، ولكنه جاء كعقاب للعمال علي قيامهم بممارسة حقهم في وقفة احتجاجية في يوم 30-1-2011،  وذلك للمطالبة بحقوقهم وهي:

التثبيت، واسترداد ما يخصم منهم تحت مسمي ضرائب وتأمين إصابات عمل (22% من الأجر شامل العمل الإضافي، علماً بأن العمال غير مؤمن عليهم والمصنع معفي من الضرائب لمدة خمس سنوات وفقاً لما ذكره العمال)- معاملة عمال السراكي مثل عمالة العقود من حيث المستحقات مثل الـ 6شهور التي صرفت أرباح لمن لديهم عقود- احتساب يوم إجازة مدفوعة الأجر.

ومما يزيد الطين بلة، أن يكون ضمن المفصولين تعسفياً، عمال مصابين بعاهات بسبب إصابة أثناء العمل منهم سمير محمد البحيري، اللحام والذي أدت إصابته أثناء العمل (الكلارك داس علي رجله) إلي إصابته بكسر مضاعف أدي لتركيب شرائح في قدمه وركبته، وبدلاً من أن يعالج وتصرف له كل حقوقه، فإنه يتم فصله من العمل، ويترك بدون علاج، وحتي لم تثبت إصابة العمل حتي يحفظ لسمير حقوقه في حالة إصابته بأي نسب عجز مما يقعده فلا يستطيع العمل.

يقول سمير:” أنا العملية بتاعتي بعد إصابة العمل اللي حصلت لي في الشركة يوم الجمعة الموافق 25-3-2011 أتكلفت 6 آلاف جنيه الشركة ما دفعتليش حاجة، زملائي هما اللي لموا من بعض ودفعوا لي حق العملية لأن يوم الجمعة الإدارة بتبقي مش موجودة في الشركة، المدير قال لهم اتصرفوا وبعدين الشركة تدفع، وبعدها الشركة ما سألتشي فيا، يومها اتركب لي 9 مسامير، وبتعالج الروشته الواحدة في 4 أيام بـ 227 جنيه غير بقية الأدوية والعلاج الطبيعي، ولما رحت لمدير الشئون القانونية فادي الشماع قال لي ما هو أنت ما كانشي متأمن عليك، طيب هما كانوا كل شهر بيخصموا مني أكثر من 700 جنيه تحت مسمي تأمينات وضرايب، طيب لما أنا مش متأمن علي الفلوس دي بتروح فين؟؟؟، وبعدين أنا فاتح بيت وساكن في أيجار جديد ودلوقتي محتاج أعيش أكل وأتعالج، وكنت فاتح البيت ده بمرتبي، ودلوقتي أنا مش هقدر أشتغل قبل 7 شهور، أعمل أيه وأروح لمين؟؟”

في الورشة وحدها كان يعمل 32 عامل (براد ولحام وحجار) بخلاف 10 عمال لديهم عقود عمل، يعملون بشكل مستمر بداية من يوم 25-12-2009، وحتي فصلهم يوم الثلاثاء الماضي الموافق 14 -6-2011، وعلي الرغم من هذا يعتبرونهم عمال سراكي يحتسبون أجورهم باليوم، اليوم الذي يعملون فيه يأخذون أجره واليوم الذي لا يعملون فيه لا يأخذون أجره بذلك يحرمون من كل حقوقهم في الإجازات الأسبوعية والسنوية وإجازات المناسبات، بالإضافة أنهم غير مؤمن عليهم وليس لديهم تأمين صحي.

ويقول أحد المفصولين:” المهندس عبد العزيز قال لنا يا ريت تاخدوا أجازة علي ما نتصل بيكم، طيب ما يحط نفسه مكاني أما كنت ببذل كل طاقتي في الشغل، ويمروا علينا ويقولوا شدوا حيلكم يا رجاله، ودلوقتي يقولوا لنا خدوا أجازة طب لحد أمتي، وإزاي وإحنا ورانا بيوت والتزامات؟؟!!”

ويكمل عامل آخر:” اللي بنسمعه في التلفزيون غير اللي بيحصل معانا، بيقولوا بيثبتوا العمالة المؤقتة، ، إحنا فصلونا خالص، طيب نروح فين، وكمان شفنا نجيب سويرس مع عمرو أديب بيقول أي عمال عندي مظلومة أنا بقف معاها، وأي واحد بيستمر عندي في الشغل أكثر من سنة أنا بثبته؟؟ طيب فين الكلام ده، إحنا بنشتغل عندك من سنتين بشكل مستمر وبدل ما تثبتنا بتفصلنا؟؟!!”

ويقول أحد العمال:” المصنع كان ينتج سنوياً 85ألف طن من السكر، وفي هذا العام انتج 100 ألف طن،أي أن الإنتاج قد أزداد فلماذا خراب البيوت؟؟!!”

ويعلق أحد العمال فيقول:”في الوقت الذي يتم فصل العمال دي كلها من الشركة، نجد أن الإدارة بتعين عاملين جدد من أصدقائهم ومعارفهم، هي الخواطر والكوسة لسة شغالة حتي  بعد الثورة؟؟”

وقالت والدة أحد العمال المفصولين:” ابني كان من الناس اللي حطت أول طوبة في المصنع، وأبوه فوق الستين سنة ومريض بالكبد، وبنتي مطلقة وقاعدة معانا، وهو اللي كان بيصرف علينا، دلوقتي بعد ما خلعوه من المصنع نعيش منين وإحنا لا عندنا أرض ولازرع، والعلاج غالي والدنيا غالية، طب نعمل أيه؟؟!!”

والسؤال هو أين الوزارات المسئولة أين وزير القوي العاملة من فصل أكثر من 100 عامل دفعة واحدة ومن شركة واحدة، وتشريد أسرهم؟، أين وزارة التأمينات من عمال غير مؤمن عليهم، وتحدث لهم إصابات عمل ولا تثبت؟؟،  تري لو تحرك هؤلاء العمال للدفاع عن أنفسهم وحقوقهم ضد أصحاب رؤس الأموال، هل يحق لأحد إدانتهم، أو تجريمهم وهم يدافعون عن حقهم في العمل، ويدافعون عن حق أبنائهم في حياة كريمة؟؟ 

علينا جميعا أن نطالب بعودة كل العمال المفصولين تعسفيا في كل الشركات، وتثبيتهم وأن يأخذوا كل حقوقهم، وضمنهم العمال المفصولين من شركة النيل للسكر ومنهم:

مراجع شلتوت- رجب حميدة- ماهر مرسي- هلال جمعة- هشام محمد- محمد فؤاد- خميس فتحي- علي محمد- أبراهيم محمد- حسن محمد- عبد العزيز علي- سمير محمد البحيري- أحمد عطية- مؤمن محمد- صلاح قاسم- محمد يونس- عبد الله دياب- فتحي سليط- أحمد خميس- اسماعيل عيد- أنور عبد الونيس- حسن مسعود سليمان عزام.

6 Responses

  1. […] […]

  2. […] […]

  3. الناس دى حرام يتسابو كدة عندة بيوت مفتوحة فين العدل وفين الى الثورة غيرتة

  4. ويكمل عامل آخر:” اللي بنسمعه في التلفزيون غير اللي بيحصل معانا، بيقولوا بيثبتوا العمالة المؤقتة، ، إحنا فصلونا خالص، طيب نروح فين، وكمان شفنا نجيب سويرس مع عمرو أديب بيقول أي عمال عندي مظلومة أنا بقف معاها، وأي واحد بيستمر عندي في الشغل أكثر من سنة أنا بثبته؟؟ طيب فين الكلام ده، إحنا بنشتغل عندك من سنتين بشكل مستمر وبدل ما تثبتنا بتفصلنا؟؟ا
    ازاى دة يكون نفس كلام الراجال الى فصل الناس بتعتو ولا دة كلام تلفزيون وبس لازم القوة العاملة يكون ليها موقف والا هنشوف كدة كتير

  5. اولا اللى حصل ده نجيب ميعرفش عنه حاجه

    والخطاء اساسا كان خطاء اداره المصنع هو اللى عين عمال اكتر من احتياج المصنع

    والعمال دول عرفين من اول يوم اتعينوا فيه انهم لمده انتهاء الموسم او لحد ميخلصوا الشغل المطلوب منهم هيمشوا

    مش معنى ان ااداره الشركه بتصحح وضعها يبقى كده جريمه

    وكمان ده مش ظلم لان وجود ناس فى مكان من شغل يبقى حرام هما اللى لازم يعرفوا كده

    ويعرفوا ان المكان اللى هيخدوا منه فلوس لازم تديله عمل قصاده والعمل اللى كان العمال بيقوموا بيه انتهى

    يبقى هيخدوا مرتبات مقابل ايه

    ومع ذلك المصنع اتفق معاهم انهم اول ناس هيرجعوا تانى الشغل لو حال البلد استقر وبداء نجيب يعمل الخط التانى للمصنع

    شهاده حق

  6. بعد اللى قريته ده عرفت واتأكدت ان البلد دى عمر ماحالها هايتصلح. وده عشان فيه ناس كذابه بتفترى غير الحقيقه لمجرد الكذب وخلاص.
    اولا: العماله الموسميه (العمال اللى بيشتغلوا خلال فنرة موسم البنجر بس)، وكانت الشركه واضحه من اول يوم مع العماله الموسميه انه مفيش تثبيت وهما كانوا عارفيين كده كويس لانهم وده مش عيب فيهم مالهومش لازمه غير كمساعدين بس للموظفين او عشان التنظيف والاعمال اللى مابتتطلبش انى اعينلها واحد يعملها لكن علشان خلال الموسم بيبقى الشغل كتير فبنعين الموسميين دول للمساعده فقط.

    ثانيا: الاخ سمير ربنا يشفيه ويعافيه يقدر يقولنا الاول ايه اللى وداه عند الكلارك اللى بيقول انه داس على رجله ولما تكون شهادات كل زمايله اللى كانوا موجودين ساعتها بتقول انه هو اللى كان غلطان وتم تحذيره من الكلارك مرات عديده. ولا احنا لما نسيب اشغالنا ونروح نهرج مع اصحابنا فى اوقات العمل وتقع الطوبه فى المعطوبه نرجع نقول دى اصابة عمل.

    ثالثا: مبلغ ال 700 جنيه اللى هو بيقول كانوا بيتخصموا منه تأمينات ده عشان العماله الموسمية بيدفعلها حاجه اسمها تامين مقاوله وده متعارف عليه فى التامينات واى كان المرتب اللى العامل بيخده مبلغ التامينات مابيزدش عن 20 جنيه فى الشهر وده الشركه اللى بتدفعه بحكم القانون ومابتخصمش من العامل اطلاقا. ثم اذا كان اللى بيتكلم مجنون عارف ياسيد سمير شفاك الله وعافاك ان كنت بتدفع 700 تامينات ده معناه انك كنت بتاخد 5000 جنيه فى الشهر عشان بس لما المره الجايه تكدب وتلفق تبقى تلعبها صح.

    رابعا: كون ان قوانين الاستثمار فى البلد بتدى مدة اعفاء ضريبى للمنشأت لتشجيع الاستثمار ده مش معناه انك الاعفاء ده على الموظفيين هما كمان، لا ياحبيبى زيك زى اى موظف فى اى حته فى مصر.

    خامسا: لما العماله الموسميه استغلت الثوره اللى فى البلد وقامت بمظاهره فى المصنع وكسروا اتوبيس وبوابة المصنع الشركه راضتهم وزودت المرتبات 200 مره واحده لكل الموسميين وكمان احتسبت يوم اجازه اسبوعيه مدفوعة الاجر وكمان مكافأة نهاية الموسم ودى اساسا كانت موجوده من السنه اللى فاتت.

    سادسا: الاخ اللى بيقول الشركه بتعين الاصدقاء والمعارف، وده على اساس انها تكيه مثلا ولا قطاع عام ومع ان الاخ اللى قبله بيقول ان انتاج الشركه زاد السنه دى، والله اذا كان الاقارب والمعارف هايزودوا الانتاج بالشكل ده يبقى مليون اهلا بيهم.

    واخيرا ارجو لجميع المذكرين فى المقال التوفيق فى حياتهم وكلمه اخيره ليهم انتوا رزقكم على الله فياريت بلاش الافتراء علشان ربنا يباركلكم

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: