إحنا مين/ شارك معنا


لأن مصر بقت بلدين… أو على رأي عمنا الأبنودي “شعبين شعبين شعبين”… ولأن البلد دي بقت بتاعة شوية حرامية وهليبة… فميش حل غير إن الأغلبية… يعني العمال والفلاحين والموظفين الصغيرين والطلبة والمهنيين الفقرا والعاطلين والأرزقية… يحطوا إيديهم في إيدين بعض عشان يناضلوا ضد اللي بينهبوهم.

“حركة تضامن” مؤمنة بأن نضال الأغلبية من فقرا وكادحين هو الطريق إلى مصر التانية… مصر بتاعتنا إحنا… مصر اللي مفيهاش فقير ومظلوم ومفيهاش ساكن في عشة ومش لاقي شغل… ولا فيهاش حرامي وهليب وسارق قوت غلابة وساكن في قصر ومش داري بحالنا.

إحنا مؤمنين بإن حلمنا بالتغيير ممكن… وإن المستقبل في إيدينا… وعشان كده إحنا قررنا نشارك، كل ساعة وكل يوم، في معارك كل صاحب حق ضد اللي بيستغله… قررنا نكون في خدمة كل كادح دخل معركة جماعية مع زملاته ضد اللي سرقوا البلد دي وأهلها… قررنا ندعم نضال الفقرا ضد الظلم والاستغلال.

“حركة تضامن” شايفة إن المعارك اللي بتتفتح في كل مصانع وشركات ومزارع مصر هي بداية طريق طويل للتغيير… المعارك دي هي أساس قوتنا وأساس كل تغيير حقيقي… لكن المطلوب إن المعارك تتوحد وتتشبك وتبقى يد واحدة… الضرائب العقارية تتربط بالمحلة… والمحلة تبني جسور مع الإداريين في التربية والتعليم… والاتنين يفكروا في القرصاية وجزيرة الدهب… وده لأن مشكلتنا واحدة… واللي سارقنا واحد… ولازم نتوحد… وكمان لازم نفكر في مستقبل مصر… مصر كلها مش بس مصنعنا وشركتنا وحتتنا… إحنا اصحاب البلد دي ولازم إحنا اللي نقرر مستقبلها… السياسة مش حاجة بتاعة ناس تانية… إذا كانت السياسة معناها مستقبل مصر… فاحنا كلنا سياسيين… ومش هانسيبهم يسمموا حياتنا ومستقبل عيالنا.

“حركة تضامن” شغلتها إنها تدعم الحركة العمالية والاجتماعية الطالعة… تتعلم منها… وتحاول تنقل ليها خبرات… تاخد دروس منها… وتحاول تساعدها إنها تبص لقدام وتنتصر… هي دي شغلتنا… وهو ده اللي بنحلم بيه: حركة جماهيرية واحدة تسعى لتحقيق الحرية ورغيف العيش والكرامة لينا ولأولادنا. وعشان نحقق اللي بنحلم بيه إحنا بنبذل كل طاقتنا في عمل صغير… لإن إحنا اللي بنموله على قدنا… لكن إحنا مقتنعين إن العمل الصغير ده هو الطريق الصح للتغيير… طريق الاعتماد على نضال الجماهير من أسفل.

مجموعات عمل تضامن

مجموعة العمل الجماهيري: دي المجموعة اللي بتنزل الشارع وترتبط بالنضالات وتحاول تقدم ليها الدعم والخدمة… يعني مثلا تحاول توصل صوت النضالات للصحافة والإعلام… تحاول تعرفها بالمحامين اللي ممكن يساعدوها قانونيا… وتحاول تنقل ليها خبرات مناضلين أقدم يساعدوها على تحقيق الانتصار… كمان المجموعة دي بتنظم ندوات ومؤتمرات جماهيرية (مرة كل شهرين) حوالين قضايا مختلفة تهم الحركة وقطاعاتها المختلفة… وفوق كده هي بتنظم مؤتمرات صحفية وأشكال أخرى من الدعم والارتباط

مجموعة ملتقي الحوار:: ملتقي الحوار هو منتدى المناقشة والتفكير بصوت عالي في تضامن… في الملتقي بنسأل نفسينا أسئلة كتيرة… ليه حركات جماهيرية تانية في العالم انتصرت؟ وإيه اللي ممكن نتعلمه منها؟ وبنسأل نفسينا عن طرق النضال الصح وطرق النضال الغلط… وكمان بنسأل أسئلة كتيرة تانية الهدف منها إن إحنا نبقى فاهمين إيه اللي ممكن يساعدنا على الانتصار في معاركنا واحتجاجاتنا.

مجموعة الاتصال والمتابعة: المجموعة دي شغلتها ممكن تبقى مملة شوية، لكن هي مهمة خالص… المجموعة دي دورها تربّط مجموعات تضامن ببعضها… وتنظم الاجتماعات وتدعي لها… وكمان تنسق الشغل مع مجموعات تانية غير تضامن… يعني باختصار دي مجموعة العمل الإداري المطلوب لنجاح أي شغلانة في الدنيا.

مجموعة المؤتمر السنوي: المجموعة دي شغلتها إنها تحضّر لمؤتمر سنوي اسمه “مؤتمر كادحي مصر”… المسألة هي إننا عايزين نربط كل الحركات الاجتماعية في مصر ببعضها… نربط الصيادلة بالعمال بالموظفين بالمهنيين بالفلاحين… ده طريق طويل وصعب… لكن المؤتمر ده خطوة على الطريق… وفيه هندعي قيادات كل النضالات… وكمان كل اللي شاركوا في المعارك الجماهيرية… وهنحاول نخليهم يتناقشوا مع بعض ويقيّموا نشاطهم وينسقوا مع بعض على قدر الإمكان.

هيئة تحرير نشرة تضامن: النشرة بالنسبة لنا حاجة مهمة خالص… النشرة وسيلة عبقرية لربط النضالات والمناضلين… لنقل الخبرات والمعلومات… لتوحيد الحاجات المتفرقة… وعشان كده مجموعة النشرة وهيئة تحريرها مهياش مجموعة برج عاجي… دول ناس بينزلوا النضالات ويشاركوا فيها ويكتبوا عنها… وكمان دول ناس بينظموا على صفحات النشرة حوارات بين المناضلين والقيادات… عشان ننقل الخبرة ونتعلم من بعض.

هيئة تحرير المدونة: المدونة كمان بتلعب دور شبيه بدور النشرة… ولكن لجمهور مختلف شوية… وكمان بشكل أسرع من النشرة… وده مطلوب لأن الإنترنت بقى حاجة مهمة خالص في مصر ووسط اللي بيناضلوا في المعارك العمالية والاجتماعية.

ملتقى تضامن الشهري: الملتقى ده هو حاجة زي الجمعية العمومية بتاعة تضامن… بنتقابل مرة كل شهر… بس مش بنتقابل لوحدينا… لا… إحنا بندعي قيادات في الحركة… وصحفيين ومحامين… وبنناقش معاهم الحركة وتطوراتها وإيه المساندة اللي محتاجاها الاحتجاجات والمعارك المختلفة… وإيه الأفكار المطلوبة لتطوير الحركة… ولكن كمان بنناقش بعض هموم حركة تضامن الخاصة… مثلا تطوير شكل النشرة عشان تليق بالجماهير اللي مكتوبة عشانهم… وإزاي تضامن ترتبط بنضال معين… والموقف اللي المفروض ناخده من دعوة معينة للتظاهر أو الاعتصام… وغيرها من الأمور.

للتواصل مع حركة تضامن

https://tadamonmasr.wordpress.com

tadamon.egy@gmail.com

0106114257

للمتابعة

Advertisements

One Response

  1. […] https://tadamonmasr.wordpress.com/%D8%B4%D8%A7%D8%B1%D9%83-%D9%85%D8%B9%D9%86%D8%A7/ LD_AddCustomAttr("AdOpt", "1"); LD_AddCustomAttr("Origin", "other"); LD_AddCustomAttr("theme_bg", "ffffff"); LD_AddCustomAttr("theme_border", "666666"); LD_AddCustomAttr("theme_text", "333333"); LD_AddCustomAttr("theme_link", "105CB6"); LD_AddCustomAttr("theme_url", "8DAB3B"); LD_AddCustomAttr("LangId", "1"); LD_AddCustomAttr("Tag", "jan25"); LD_AddCustomAttr("Tag", "%d9%81%d8%a7%d8%b9%d9%84%d9%8a%d8%a7%d8%aa-%d9%85%d9%88%d8%a7%d9%82%d9%81-%d9%88%d8%aa%d8%ad%d9%84%d9%8a%d9%84%d8%a7%d8%aa"); LD_AddCustomAttr("Tag", "%d8%b1%d8%a3%d9%8a"); LD_AddCustomAttr("Tag", "%d8%b1%d8%a3%d9%8a-%d8%aa%d8%b6%d8%a7%d9%85%d9%86"); LD_AddSlot("LD_ROS_300-WEB"); LD_GetBids(); Rate this: Share this:ShareFacebookTwitterLike this:LikeBe the first to like this post. […]

Comments are closed.

%d bloggers like this: